phir laut kar zameen pe aya na jayega phir zindagi ka bojh uthaya na jayega

awaz kho gayi kahi dunia k shor mein, ab aur hamse tumko bulaya na jayega

layeq sadd ehteram hai waaiz ka mashwera lekin ye bojh hamse uthaya na jayega

ashkon ka mojeza hai chaman dil ka sabz hai paani se aisa sabza ugaaya na jayega,

dam akhri hai dekho dil hai mubtila e marg phir hamse dil ka haal dikhaya na jayega

ye kya sitam hai Meer ka misra thama diya sehra me hamse phool ugaaya na jayega

kaise kahenge hal e dil e beqarar ham aur raaz e ish bhi to chhupaya na jaega

mahv e khayal yar the waa'n tak pahonch gaye jis ja se laut kar kabhi aaya na jayega,

dunia ki hasrton ne muhabbat samet di phir ishq ka musalla bichhaya na jayega.

by #Sageer Ahmad

hawas ne chheen li pakeezgi muhabbat ki Usuul e Qais kitabon me bhi nahi milta

wo rat jisme teri meri guftguu na ho wo dard saare azaabon me bhi nahi milta

khuda hi jane k guzregi kaise tere beghair sukuu'n ye soch k khwabon me bhi nahi milta

jo rang tujhme diya hai khuda e barhaq ne wo kul jaha'n k gulaabon me bhi nahi milta

suruur o kaif jo milta hai teri ankhon se wo lutf mujhko sharabon me bhi nahi milta

kuch is qadar wo haya ka mujassama thahra k hamse yaar hijaabon me bhi nahi milta,

usey ye khauf hai dunia ko na khaber ho jaye isi khyal se khwabon me bhi nahi milta,

bana k bhes farishton ka phirne walo sa siyaah rooh kharabon me bhi nahi milta

mujhe sawal ki lazzat pe rashk ata hai, ye lutf mujhko jawabon me bhi nahi milta.

By #Sageer Ahmad